കൂടൽമാണിക്യ ക്ഷേത്രത്തിലെ തണ്ടികവരവിന്‌ ഇരിങ്ങാലക്കുടയിൽ കോവിഡ് മാനദണ്ഡങ്ങൾ പാലിച്ച് ഭക്തിനിർഭരമായ സ്വീകരണം നൽകി

ഇരിങ്ങാലക്കുട :  ശ്രീകൂടൽമാണിക്യം ക്ഷേത്രത്തിലെ തണ്ടികവരവിന്‌ ഇരിങ്ങാലക്കുടയിൽ കോവിഡ് മാനദണ്ഡങ്ങൾ പാലിച്ച് ഭക്തിനിർഭരമായ സ്വീകരണം നൽകി. തൃപ്പുത്തരിക്കുള്ള നിവേദ്യവസ്തുക്കള്‍ മുള തണ്ടികയില്‍ കെട്ടി കാല്‍നടയായി വാദ്യമേള ആഘോഷങ്ങളോടെ കൂടൽമാണിക്യം കിഴേടമായ ചാലക്കുടി പോട്ടപ്രവര്‍ത്തി കച്ചേരിയില്‍ നിന്നും ക്ഷേത്രത്തിലേക്ക് കൊണ്ട് വരുന്ന ചടങ്ങാണ് തണ്ടികവരവ്. കോവിഡ് 19 പ്രോട്ടോക്കോൾ നിയന്ത്രണങ്ങൾക്ക് വിധേയമായി തൃപ്പുത്തരി, മുക്കുടി ആചാരങ്ങൾ ഒക്ടോബർ 24, 25 തിയ്യതികളിൽ നടത്തും. തൃപ്പുത്തരി സദ്യയും മുക്കുടി വിതരണവും ഉണ്ടായിരിക്കുന്നതല്ല. സരസ്വതി പൂജയോട് അനുബന്ധിച്ച് പൊതുജനങ്ങൾക്ക് പുസ്തകം പൂജക്ക് വയ്ക്കാനും എഴുത്തിന് തിരുത്താനും സൗകര്യം ഉണ്ടായിരിക്കുന്നതല്ല. എന്നാൽ ഭക്ത ജനങ്ങൾക്ക് കോവിഡ് മാനദണ്ഡം അനുസരിച്ച് ദർശനത്തിന് സൗകര്യം ഉണ്ടായിരിക്കുന്നതാണെന്നു കൂടൽമാണിക്യം ക്ഷേത്ര അഡ്മിനിസ്ട്രേറ്റർ അറിയിച്ചു.

പോട്ടയില്‍  നിന്നും വാളും പരിചയും, കുത്തുവിളക്കും അകമ്പടിയായി കാല്‍നടയായി തണ്ടിക കൊണ്ടുവന്നത്. 20 കിലോ മീറ്ററോളം നടന്ന് വൈകീട്ട് അഞ്ചരയോടെ തണ്ടിക ഇരിങ്ങാലക്കുട ഠാണാവിലുള്ള ദേവസ്വം വക സ്ഥലത്ത് എത്തി. തുലാമാസത്തിലെ തിരുവോണനാളില്‍ തൃപ്പുത്തരിയും പിറ്റേന്ന് മുക്കുടിയും ആചരിക്കുന്നു. വര്‍ഷത്തില്‍ ആദ്യമായി കൃഷി ചെയ്തു വിളയിച്ച വിഭവങ്ങള്‍ കൊണ്ട് കൂടല്‍മാണിക്യ സ്വാമിക്ക് നിവേദ്യം അര്‍പ്പിക്കുന്നതാണ് തൃപ്പുത്തരി. പിറ്റേന്ന് ഈ വസ്തുക്കള്‍ ദേവന് നിവേദ്യം സമര്‍പ്പിക്കും. തുടര്‍ന്ന് ഭക്തര്‍ക്ക് സദ്യയായി വിതരണം ചെയ്യും. ഇരിങ്ങാലക്കുടയിൽ വൻ മേളവാദ്യ ആഘോഷങ്ങളോടെയാണ് തണ്ടിക വരവിനെ സ്വീകരിച്ച് ആനയിക്കാറുള്ളത്. എന്നാൽ ഇത്തവണ കോവിഡ് മാനദണ്ഡങ്ങൾ പ്രകാരം ചടങ്ങുകൾ മാത്രമാക്കി ചുരുക്കി.

വാദ്യമേളങ്ങളോടെ അകമ്പടിയോടെ പുറപ്പെട്ട് പള്ളിവേട്ട ആൽത്തറയിൽ എത്തിചേർന്ന് തണ്ടികവരവ് ക്ഷേത്രത്തിലേക്കു വൈകീട്ട് 6:30ന് പുറപ്പെട്ടു . എട്ടര തണ്ട് നേന്ത്രക്കുല, രണ്ട് തണ്ട് കദളിക്കുല, ഫലവ്യജ്ഞനങ്ങള്‍, ദേവന് ആടാനുള്ള എണ്ണ, കോടിവസ്ത്രം തുടങ്ങിയവയാണ് തണ്ടികയായി ക്ഷേത്രത്തിലെത്തിയത്. 24 ന് തൃപ്പുത്തരിയും 25ന് മുക്കുടി ചടങ്ങുകളും നടക്കും.

Leave a comment

  •  
  •  
  •  
  •  
  •  
  •  
  •  
Top