ഭക്ഷണം ലഭിക്കാൻ ബുദ്ധിമുട്ടുന്നവർക്കായി സമൂഹ അടുക്കളയുമായി ആളൂർ പഞ്ചായത്ത്

കല്ലേറ്റുംകര : കോവിഡ്- 19 പ്രതിരോധ പ്രവർത്തനങ്ങളുടെ ഭാഗമായി ലോക്ക് ഡൌൺ നിലനിൽക്കുന്നതിനാൽ ഭക്ഷണം ലഭിക്കാൻ ബുദ്ധിമുട്ടുന്നവർക്കായി ആളൂർ പഞ്ചായത്ത് സമൂഹ അടുക്കള ഒരുക്കി. പഞ്ചായത്ത് കുടുംബശ്രീയുടെ നേതൃത്വത്തിൽ തെരുവിൽഭക്ഷണം കിട്ടാതെ അലയുന്നവർക്കും, അതിഥി തൊഴിലാളികൾക്കും ആശുപത്രി ജീവനക്കാർക്കും, താമസസ്ഥലങ്ങളിൽ ഏകാന്തമായി കഴിച്ചുകൂട്ടുന്നവർക്കും ഭക്ഷണ പൊതി ഇവിടെ നിന്നും എത്തിക്കും. പഞ്ചായത്ത് അങ്കണത്തിൽ കുടുംബശ്രീയുടെ നേതൃത്വത്തിൽ പൊതുജനങ്ങൾക്ക് മിതമായ നിരക്കിൽ ഭക്ഷണം ലഭ്യമാക്കുന്നതിന് വേണ്ടി കുടുംബശ്രീ കാൻ്റീൻ ആരംഭിച്ചിരുന്നു. കോവിഡിൻ്റെ പച്ഛാത്തലത്തിൽ ഇതിൻ്റെപ്രവർത്തനം നിർത്തിവച്ചിരിക്കുകയായിരുന്നു. നിലവിലെ സാഹചര്യത്തിൽ വീണ്ടും കമ്മ്യൂണിറ്റി കിച്ചനായി പ്രവർത്തനം ആരംഭിക്കുകയായിരുന്നു.

ആദ്യദിവസമായ വെള്ളിയാഴ്ച 45 പേർക്കാണ് ഇത്തരത്തിൽ ഭക്ഷണ പൊതി വിതരണം ചെയ്തത്. ആളൂർ പഞ്ചായത്ത് പ്രസിഡന്റ് സന്ധ്യ നൈസൻ ഒരു അഥിതി തൊഴിലാളിക്ക് ഭക്ഷണപ്പൊതി കൈമാറി കമ്മ്യൂണിറ്റി കിച്ചനിൽനിന്നുള്ള വിതരണത്തിന് തുടക്കം കുറിച്ചു. പഞ്ചായത്ത് വൈസ് പ്രസിഡന്റ് എ.ആർ. ഡേവിസ്, കുടുംബശ്രീ ചെയർപേഴ്സൺ രതി സുരേഷ്, സ്റ്റാന്റിംഗ് കമ്മിറ്റി ചെയർമാന്മാരായ അംബിക ശിവദാസൻ, നിക്സൺ സി ജെ, പഞ്ചായത്ത് സെക്രട്ടറി പി എസ് ശ്രീകാന്ത് മറ്റു പഞ്ചായത്ത് അംഗങ്ങൾ കുടുംബശ്രീ പ്രവർത്തകർ എന്നിവരാണ് പ്രവർത്തനങ്ങൾ ഏകോപിപ്പിക്കുന്നത്. ഉച്ചക്കും വൈകുന്നേരവും ഭക്ഷണം ആവശ്യമായുള്ളവർക്ക് വിതരണം ചെയ്യും.

Leave a comment
  •  
  •  
  •  
  •  
  •  
  •  
  •  
Top