അക്കരെ നിന്ന്

ഇരിങ്ങാലക്കുട ലൈവ് ഡോട്ട് കോമിന്റെ എന്‍ ആര്‍ ഐ പേജിന്റെ മൂന്നാം ലക്കത്തിലേക്ക് എല്ലാ വായനക്കാര്‍ക്കും സ്വാഗതം. ഈ വാരം വളരെ പ്രത്യേകത ഉള്ള ഒന്നാണ്. വിഷു കഴിഞ്ഞു, ഇരിങ്ങാലക്കുട കൂടല്‍മാണിക്ക്യം ഉത്സവം അടുത്തു. കൂടാതെ ഏറ്റവും പ്രധാനമായി ഇരിങ്ങാലക്കുട രൂപതയ്ക്ക് ഒരു പുതിയ ബിഷപ്പിനെ ലഭിക്കുന്നു. ഈ അവസ്സരത്തില്‍ വര്‍ഷങ്ങള്‍ക്കു മുന്‍പ് ഇരിങ്ങാലക്കുട രൂപതയുടെ ആദ്യ മെത്രാന്‍ ആയി നിയമിക്കപ്പെട്ട മാര്‍ ജെയിംസ്‌ പഴയാറ്റിലിന്റെ സ്ഥാനാരോഹണം നടന്ന ദിവസ്സത്തെ പറ്റി ഓര്മ വരുന്നു. വളരെ കേമമായി നടന്ന ആ ചടങ്ങില്‍ കോരി ചെരിയുന്ന മഴയുണ്ടായിട്ടു കൂടി ജാതി മത വ്യത്യാസ്സമില്ലാതെ എല്ലാ നാട്ടുകാരും പങ്കെടുക്കുകയുണ്ടായി. ഏപ്രില്‍ 18 എന്ന ശുഭ ദിനത്തില്‍ സ്ഥാനാരോഹണം ചെയ്യപ്പെടുന്ന പുതിയ മെത്രാന്‍ പോളി കണ്ണൂക്കാടന് ഇരിങ്ങാലക്കുട പ്രവാസി എന്‍ ആര്‍ ഐ പേജിന്റെയും വായനക്കാരുടെയും പേരില്‍ ആശംസകള്‍ അറിയ്ച്ചു കൊള്ളട്ടെ.

കാലാകാലങ്ങളായി ഇരിങ്ങാലക്കുടക്കു ഒരു പ്രത്യേകത ഉണ്ട്. ഞാന്‍ ഒരു പക്ഷെ ഇത് എഴുതുന്നത്‌ ശരിയായിരിക്കാം അല്ലെങ്കില്‍ തെറ്റായിരിക്കാം. കേരളത്തിലെ രണ്ടു പ്രധാന കലാലയങ്ങള്‍ ഇവിടെ സ്ഥിതി ചെയ്യുന്നു. ഒന്ന് ആണ്‍കുട്ടികള്‍ക്കും മറ്റൊന്ന് പെണ്‍കുട്ടികള്‍ക്കും. ഇപ്പോള്‍ ക്രൈസ്റ്റ് കോളേജ് ആണ്‍ കുട്ടികളും പെണ്‍കുട്ടികളും ഒരുമിച്ചു പഠിക്കുന്നു. ഒത്തിരി സുന്ദരന്മാരും സുന്ദരികളും അവിടെയും അതിനു അടുത്തുള്ള സ്കൂളുകളിലും പഠിച്ചു വളര്‍ന്നു വലുതായി പോയിട്ടുണ്ടെങ്കിലും അവരുടെ ഇടയില്‍ എന്നും മത സൌഹര്‍ധവും സാഹോദര്യവും നില നിന്ന് പോന്നിരുന്നു. ഒന്ന് തിരിഞ്ഞു നോക്കിയാല്‍ ഇരിങ്ങാലക്കുടയില്‍ ഒട്ടനവധി പ്രധാന കഥാപാത്രങ്ങള്‍ ജീവിച്ചു കടന്നു പോയ കഥകള്‍ നമ്മുക്ക് ചികഞ്ഞെടുക്കാം. അവര്‍ ഓരോരുത്തരുടെയും തന്നാലാവുന്ന വിധത്തില്‍ ഇരിങ്ങാലക്കുടയുടെ വളര്‍ച്ചയുടെയും വികസ്സനത്തിന്റെയും പുറകിലുള്ള പങ്കുകളും അവരുടെ ചെറിയ വലിയ തമാശകളും ഈ ഒരു പേജിലൂടെ ഞാന്‍ കൊണ്ട് വരാന്‍ ഉള്ള ഒരു ശ്രമത്തിലാണ്. ഉണ്ണായി വാര്യര്‍ തൊട്ടു ഇന്ന് ഇന്നോസ്സെന്റ്റ് ചേട്ടന്‍ വരെ എത്തി നില്‍ക്കുന്ന ആ സൃങ്കലയില്‍ ഒട്ടനവധി ചെറിയ വലിയ കഥാപാത്രങ്ങള്‍ കണ്ണികള്‍ ആയിട്ട് കടന്നു പോയിട്ടുണ്ട് കടന്നു പോയിട്ടുണ്ട്.  ചിലര്‍  ഇന്നും നിശബ്ദമായി ജീവിച്ചിരിക്കുന്നുണ്ട്. അവരെ ആരെയും മറക്കാതെ ഈ പംക്തിയിലൂടെ അവരുടെ ചെറുതും വലുതുമായ തമാശകളും കാര്യങ്ങളും നമ്മുടെ വായനക്കാര്‍ക്ക് പരിചിതമാക്കുവാനും ഒരു ശ്രമം നടത്തണം എന്ന് ആഗ്രഹിക്കുന്നു. 

നന്ദി വൃക്ഷങ്ങള്‍ നട്ട് മാതൃക കാട്ടുകയും വിഷുദിനം മുതല്‍ കോളനി പ്ലാസ്റ്റിക് വിമുക്തമാക്കാന്‍ പ്രതിജ്ഞ എടുക്കുകയും ചെയ്ത വൃന്ദാവന്‍ കോളനിയിലെ അംഗങ്ങള്‍ പ്രവാസികളുടെ പ്രത്യേകം അഭിനന്ദനം അര്‍ഹിക്കുന്നു. ഈ മാതൃക മറ്റു ഭാഗങ്ങളിലേക്കും ഒരു വൈറസ്‌ പോലെ പടരുവാന്‍ ഞങ്ങള്‍ ആകാംഷയോടെ കാത്തിരിക്കുന്നു.

പണ്ടുതൊട്ടേ പേരുകേട്ട ഇരിങ്ങാലക്കുട പടക്ക വിപണിയിലും ചൈന മേല്‍ക്കോയ്മ നേടിയ ഒരു വാര്‍ത്ത എന്നെ പ്രത്യേകം ശ്രദ്ധ ആകര്‍ഷിച്ചു. "ചൈനീസ് ആധിപത്യത്തില്‍ ഇരിങ്ങാലക്കുടയില്‍ പടക്കവിപണി ഉണര്‍ന്നു". അങ്ങനെ ആ ഒരു വ്യവസായ രംഗത്തിനും കൂടി ഇരിങ്ങാലക്കുടയില്‍ ചൈനയുടെ ചെങ്കൊടി പാറാന്‍ അവസ്സരം ഒരുക്കി ഇത്തവണ വിഷുക്കാലം. 

 ഇരിങ്ങാലക്കുട നഗരസഭാ കുടുംബശ്രീ യൂണിറ്റുകളുടെ ആഭിമുഖ്യത്തില്‍ ബസ് സ്റ്റാന്റില്‍ നടക്കുന്ന മാസചന്തയില്‍ കദളീരസായനത്തിനു ആവശ്യക്കാരേറുന്നു എന്ന വാര്‍ത്തയും എന്നെ വല്ലാതെ ആകര്‍ഷിച്ചു. സുസ്ഥിര കൊടകര വികസന പദ്ധതിയുടെ ഭാഗമായി നിര്‍മ്മിച്ച ഈ കദളി രസായനം, ഇരിങ്ങാലക്കുടയില്‍ നിന്ന് കൂടുതല്‍ വിപനികളിലേക്ക് എത്തിച്ചു നമ്മുടെ നാട്ടിലെ കര്‍ഷക്കാര്‍ക്ക് പുരോഗതിയുടെ പടവുകളിലേക്ക് എങ്ങനെ നൂതന മാര്‍ഗങ്ങള്‍ ഉപയോഗിച്ച് മുന്നേറാന്‍ ഉള്ള സാധ്യതകള്‍ നമ്മള്‍ കണ്ടെത്തേണ്ടിയിരിക്കുന്നു.

കമ്മ്യൂണിറ്റി ജേര്‍ണലിസം എന്ന പ്രസ്ഥാനം എങ്ങനെ ഫലപ്രദമായി ഉപയോഗിക്കാം എന്നതിന്റെ ഉദാത്തമായ ഉദാഹരണങ്ങള്‍ ഫലപ്രദമായി ഈ സൈറ്റിലൂടെ നമുക്ക് കാണുവാന്‍ കഴിയുന്നുണ്ട്. കൂടുതല്‍ കൂടുതല്‍ യുവതിയുവാക്കള്‍ മുന്നോട്ടു താല്‍പര്യത്തോടു കൂടി വന്നു വേണ്ട കാര്യങ്ങള്‍ക്ക് വേണ്ട സമയത്ത് പ്രതികരിക്കുന്ന ഒരു ജനതയെ പടുത്തുയര്‍ത്തുവാന്‍ ഉള്ള ഒരു കൂട്ടായ ശ്രമത്തിന്റെ മുന്നോടിയാവട്ടെ ഈ പരിശ്രമം.

അടുത്ത ലക്കം വരുന്നതിനു മുന്‍പ് ശ്രീ കൂടല്‍മാണിക്യം ക്ഷേത്രോത്സവം 2010 കൊടികയറി ഉത്സവ ആഘോഷങ്ങള്‍ക്ക് ആരംഭം കുറിക്കും. അപകടവിമുക്തമായ ഉത്സവക്കാലം എല്ലാ നാട്ടുകാര്‍ക്കും നേര്‍ന്നു കൊള്ളുന്നു. 

രമേശ്‌ മേനോന്‍
അബുദാബി 
19.04.2010

പരിചയപ്പെടുത്താം ഒരു ഇരിങ്ങാലക്കുട പ്രവാസിയെ - ഹരി പുത്തെന്‍വീട്ടില്‍ 

ഈ ലക്കത്തില്‍ പരിചയപ്പെടുത്തുന്ന വ്യക്തിയെ പറ്റി വിവരിക്കണമെങ്കില്‍ എന്റെ ഓര്‍മകളുടെ ഘടികാരം ഒരു പത്തൊന്‍പതു കൊല്ലം പുറകോട്ടു തിരിക്കണം. ദുബായില്‍ ജോലി ചെയ്തിരുന്ന കാലം. അന്ന് ഇന്നത്തെ പോലെ മൊബൈല്‍ ഫോണോ ഇമെയില്‍ സൌകര്യങ്ങളോ ഒന്നും ഇല്ല. വൈകീട്ട് ജോലി കഴിഞ്ഞു റൂമില്‍ കയറിയതെ ഉള്ളു. അപ്പോള്‍ ഒരു സുഹൃത്ത്‌ കരഞ്ഞു കൊണ്ട് ഓടി വരുന്നു. നാട്ടില്‍ നിന്ന് അങ്ങേരുടെ ജോലി സ്ഥലത്തേക്ക് ഒരു ഫോണ്‍. അമ്മക്ക് സുഖമില്ലാതെ അത്യാസ്സന്ന നിലയിലാണ് എങ്ങനെയെങ്കിലും നാട്ടിലേക്ക് ഉടനെ ഉടനെ എത്തണം. അന്ന് ഇന്നത്തെ പോലെ യാത്ര സൗകര്യം ഒന്നും ഇല്ല. എന്ത് ചെയ്യും എന്ന് എല്ലാവരും കൂടി ആലോചിച്ചു. ആരോ അപ്പോള്‍ പറഞ്ഞു നമ്മുടെ ഇരിങ്ങാലക്കുടയില്‍ നിന്നുള്ള ഹരി എന്നൊരാള്‍ ഹൌസ് ഓഫ് ട്രാവെല്‍സ് എന്ന സ്ഥാപനത്തില്‍ ജോലി ചെയ്യുന്നുണ്ട്. അദ്ധേഹത്തെ ഒന്ന് വിളിച്ചു നോക്കാം. ഏതെങ്കിലും ഒരു വിമാനത്തില്‍ ഉടനെ യാത്ര തരമാക്കി തരാതിരിക്കില്ല. അപ്പോഴേക്കും ഞങ്ങള്‍ കൂട്ടുകാര്‍ക്ക് മനസ്സിലായിരുന്നു, ആ ഫോണ്‍ വിളി ആ സുഹൃത്തിന്റെ അമ്മയുടെ മരണ വാര്‍ത്ത‍ വേറൊരു വിധത്തില്‍ പറഞ്ഞു അറിയിച്ചു കൊണ്ടുള്ളതാണ് എന്ന്. എല്ലാവരും കൂടി ഹരിയുടെ അടുത്തെക്കായി ഓട്ടം. ഭാഗ്യം എട്ടുമണി ആയിട്ടില്ല. ഓഫീസി അടക്കുന്നതിനു മുന്‍പ് അവിടെ എത്തി, ഞങ്ങള്‍ കാര്യം പറഞ്ഞു. നല്ല തിരക്കുള്ള സമയമാണെങ്കിലും നോക്കട്ടെ എന്ന് പറഞ്ഞു ആ ചെറുപ്പക്കാരന്‍ ഒന്ന് കൂട് ശ്രദ്ധിച്ചു നോക്കി. അല്ല ഇതാര് രമേഷല്ലേ.

ഇരിങ്ങാലക്കുടയില്‍ കളിച്ചു നടക്കുമ്പോള്‍ ഉള്ള പരിചയം.അമ്പലത്തിലും ഇടയ്ക്കു കാണും. അത് ഒരു സുഹൃദ്ബന്ധമായി നില നിന്നു. പിന്നെ കാണുന്നത് വര്‍ഷങ്ങള്‍ക്ക് ശേഷം മറ്റൊരു സുഹൃത്തിന്റെ അത്ത്യാപത് സമയത്ത്.  അത് 1991 ഇല്‍. അന്ന് ആ സുഹൃത്തിനു കൃത്യ സമയത്തിന് തന്നെ യാത്ര തരമാക്കിയത്തിനു പിന്നില്‍ ഹരിയുടെ കഴിവ് ചില്ലറയൊന്നും അല്ല.

ഹേംഹരി പുത്തെന്‍വീട്ടില്‍,  അഥവാ ഹരി എന്ന പേരില്‍ അറിയപ്പെടുന്ന ഈ ഇരിങ്ങാലക്കുടകാരനെ പറ്റിയും, അദ്ദേഹം നിശബ്ധമായും, നിസ്വാര്‍ത്തമായും ചെയ്തു വരുന്ന നല്ല കാര്യങ്ങള്‍ പറഞ്ഞാല്‍ ഇവിടെ പേജുകള്‍ നിറക്കാം. കുറച്ചു കാലം ദുബായ്, ഷാര്‍ജ എന്നീ സ്ഥലങ്ങളില്‍ ജോലി നോക്കിയ അദ്ദേഹം 1993 മുതല്‍ ഇന്ത്യന്‍ എയര്‍ലൈന്സില്‍ കുവൈറ്റിലെ സ്ഥിര ജോലിക്കാരില്‍ ഒരാളായി. അവിടെ നിന്ന് 1996 ഇല്‍ ദുബായിലേക്ക് മാറ്റം ലഭിച്ചു വന്ന ഹരി, മറുന്നാട്ടിലെ മലയാളികളില്‍ പലര്‍ക്കും സുപരിചിതനാണ്. ഇതിനിടയില്‍ 1999 ഇല്‍ അലെയിനിലേക്ക് മാറ്റമായി അവിടെ മൂന്ന് വര്ഷം ജോലി ചെയ്യുകയുണ്ടായി. അലൈനില്‍ നിന്ന് അബുദാബിയിലെക്കായിരുന്നു 2002 ഇല്‍ ‍ഹരിയുടെ മാറ്റം. ഈ കാലയളവില്‍ എല്ലാം ഇന്ത്യന്‍ എയര്‍ലയിന്‍സും ഹരിയോടൊപ്പം പുരോഗമിച്ചു കൊണ്ടിരിക്കയായിരുന്നു. ആഴ്ചയില്‍ രണ്ടു ദിവസ്സം കോഴിക്കോട്ടേക്ക് മാത്രം ഉണ്ടായിരുന്ന രണ്ടു വിമാനങ്ങളുടെ സ്ഥാനത്തു ഇന്ന് ഇന്ത്യുടെ 14 കേന്ദ്രങ്ങളിലെക്കായി 84 ഓളം വിമാനങ്ങള്‍ ദുബായില്‍ നിന്നും, ഷാര്‍ജയില്‍ നിന്നുമായി പറന്നുയരുന്നു. ഏകദേശം അഞ്ചു സ്ഥലങ്ങളിലേക്ക് അവര്‍ നിത്ത്യവും സര്‍വീസ് നടത്തുന്നുണ്ട്. അതില്‍ 700 ഓളം യാത്രക്കാര്‍.  ദിവസ്സേന ഒരു നൂറു യാത്രക്കാര്‍ അബുദാബിയില്‍ നിന്ന് തന്നെ പോകുന്നുണ്ട്. അവരില്‍ എത്ര പേര്‍ അത്യാവശ്യമായി നാട്ടില്‍ പോകുന്നവരുണ്ടാവും. ഇവരെയൊക്കെ യഥാവിധം കൈകാര്യം ചെയ്യുന്നതില്‍ ഹരിക്കുള്ള കഴിവ് ചില്ലറയൊന്നും അല്ല.

ഈ കാലയളവിലെ മറക്കാത്ത പല കാര്യങ്ങളും ഹരിയുടെ മനസ്സില്‍ കിടപ്പുണ്ട്. അവയില്‍ ഒരു സംഭവം, അലൈനില്‍ ജോലി ചെയ്യുമ്പോള്‍ ഒരു അറബി സ്പോന്‍സര്‍ തന്റെ കീഴില്‍ പണി എടുത്ത ഒരു തമിഴ്നാട്ടുകാരന്റെ ശവശരീരം, മരിച്ചു പതിമൂന്നു മാസ്സക്കാലത്തിനു ശേഷം അയക്കുവാന്‍ മോര്‍ച്ചറിയില്‍ നിന്ന് എടുത്തു, മറ്റു രേഖകള്‍ എല്ലാം തയ്യാറാക്കി അയക്കുവാന്‍ വേണ്ടി സമീപിച്ചതാണ്. ആരോരും ഇല്ലാതെ ഗ്രാമങ്ങളില്‍ നിന്ന് അറബി നാടുകളിലെ ഏതെങ്കിലും മുക്കിലും മൂലയിലും പണിയെടുത്തു അപകടമരണം സംഭവിക്കുന്ന സാധാരണ ഇന്ത്യക്കാരന്റെ അവസ്ഥയെ ഹരി ഈ അവസ്സരത്തില്‍ ഓര്‍ത്തു പോവുകയാണ്. ആ അവസ്സരങ്ങളില്‍ പല സമയത്തും സന്നദ്ധ സംഘടനകള്‍ ഇതൊന്നും അവരുടെ ശ്രദ്ധയില്‍ പെടാതെയോ അറിയാതെയോ പോകുന്നത് കൊണ്ടുള്ള ഭവിഷ്യത്തുകള്‍ ചില്ലറയല്ല.

ഇവിടെയും കൊണ്ട് നില്‍ക്കുന്നില്ല ഹരിയുടെ ചുമതലകള്‍. മുന്‍പൊക്കെ, ഏതു കലാ സംഘടനയും നാട്ടില്‍ നിന്ന് കൂട്ടമായി പ്രമുഖന്മാരെ കലാ വിരുന്നുകള്‍ക്കായി സംഘടിപ്പിക്കാന്‍ തീരുമാനിക്കുമ്പോള്‍ തന്നെ അവരുടെ പകുതി പണി കുറഞ്ഞു എന്ന ധൈര്യം അവര്‍ക്ക് ഉണ്ടായിരുന്നു. ഹരിയെ പിടിച്ചാല്‍ നല്ല ഇളവില്‍ അതിന്റെ കാര്യക്രമത്തില്‍ ടിക്കെറ്റും മറ്റു ചില്ലറ സ്പോന്സര്ഷിപ് കാര്യങ്ങളും വളരെ എളുപ്പത്തില്‍ നടക്കും. ഇന്ന് പക്ഷെ ആ ഒരു ഭാഗ്യം മലയാളിക്ക് നഷ്ടപ്പെട്ടു. എയര്‍ ഇന്ത്യയും, ഇന്ത്യന്‍ എയര്‍ ലൈന്‍സും ഒന്നാക്കിയപ്പോള്‍ ‍ഈ വക ഇളവുകള്‍ എല്ലാം നിര്‍ത്തലാക്കി. കൂനിന്മേല്‍ കുരുവെന്ന പോലെ മാന്ദ്യവും.

ഇതിലൊന്നും കുലുങ്ങുന്ന ആളല്ല ഹരി. ഇപ്പോഴും നാട്ടിനും നാട്ടാര്‍ക്കും എന്ത് സഹായവും ഏതു സമയത്തും വേണമെന്നുണ്ടോ, അദ്ദേഹം തന്നാല്‍ ആവുന്ന വിധം ചെയ്യാന്‍ എന്നും തയ്യാര്‍. നാഷണല്‍ ഹൈ സ്കൂളില്‍ നിന്നും, ക്രൈസ്റ്റ് കോളേജില്‍ നിന്നും പഠനം കഴിഞ്ഞു ഗള്‍ഫ്‌ നാടുകളില്‍ ഉപജീവനമാര്‍ഗത്തിനായി എത്തി ചേര്‍ന്ന ഈ ഇരിങ്ങാലക്കുട പ്രവാസി ഭാര്യ മഞ്ജുവിനോടും, മകന്‍ അഭിജീതിനോടും ഒപ്പം അബുദാബിയില്‍ കഴിയുന്നു. അമ്മ ലീല ടീച്ചര്‍, പടിയൂര്‍ ഡോണ്‍ബോസ്കോ സ്കൂളിലെ അധ്യാപികയായി വിരമിച്ചു നാട്ടില്‍. നാടിന്റെ വികസ്സനത്തിനും നാട്ടാരുടെ കാര്യങ്ങള്‍ക്കുമായി ഒരു മടിയുമില്ലാതെ പരിശ്രമിക്കാന്‍ താല്പര്യമുള്ള വളരെ ചുരുക്കം ഹരിമാരെ മാത്രമേ നമ്മുക്ക് കാണുവാന്‍ കഴിയുകയുള്ളൂ. അതില്‍ ഒരാളെ നിങ്ങള്ക്ക് പരിചയപ്പെടുത്തുവാന്‍ കഴിഞ്ഞതില്‍ എനിക്ക് വളരെ അധികം സന്തോഷം ഉണ്ട്.

മറുനാടന്‍ വിശേഷങ്ങള്‍

നമ്മള്‍ കഴിഞ്ഞ ലക്കത്തില്‍ എഴുതിയ ഇന്ത്യന്‍ രൂപയുടെ മൂല്യ വര്‍ധന തന്നെ ഇപ്പോള്‍ എല്ലാ  വാര്‍ത്തകളിലും വളരെ പ്രാധാന്യത്തോടെ നിറഞ്ഞു നില്‍ക്കുന്നത്. സാധാരണ തൊഴിലാളിക്ക് നാട്ടിലേക്ക് പണം അയക്കാന്‍ ഒരുതരത്തിലും പറ്റാത്ത അവസ്ഥ. ഇത് ഇങ്ങനെ പോയാല്‍ ധാരാളം തൊഴിലാളികളും അവരുടെ കുടുംബങ്ങളും കഷ്ടപ്പെടും എന്നത് നിസ്സംശയം.

പെട്രോളിന്റെ നാട്ടിലും പെട്രോളിനും ഡീസലിനും വില വര്‍ധന. ഒരു ലിറ്ററിന് 0.15 ഫില്‍‌സ് വച്ചാണ് ഈ അധിക വര്‍ധന വരുന്നത്. ഇത് മറ്റുള്ള വാഹന വ്യാപാര ഇടപാടുകളെ എത്രത്തോളം സാമ്പത്തിക വിഷമത്തിലേക്ക് ഉയര്‍ത്തും എന്നുള്ളത് കാത്തിരുന്നു കാണാം. എന്തായാലും ഈ പേരും പറഞ്ഞു നാട്ടിലെ പോലെ സമരം ഒന്നും ഇവിടെ നടക്കില്ല എന്നത് ഒരു ആശ്വാസം.

യു എ യിലെ പ്രമുഖ ദിനപത്രമായ ഗള്‍ഫ്‌ ന്യൂസ്‌ ദിവസ്സേന വാര്‍ത്താ പ്രാധാന്യത്തോടെ പ്രസിദ്ധീകരിക്കുന്ന കമ്മ്യൂണിറ്റി റിപ്പോര്‍ട്ട്‌കളില്‍ നിന്ന് തിരഞ്ഞെടുത്ത മൂന്ന് റിപ്പോര്‍ട്ടുകള്‍ എല്ലാ മാസവും വാര്‍ത്തകളില്‍ ഇടം പിടിക്കാറുണ്ട്. ഇത്തവണ ആദ്യത്തെ മൂന്ന് സ്ഥാനത്തില്‍ എത്തി ചേര്‍ന്നത്‌ ക്രൈസ്റ്റ് കോളേജിലെ മുന്‍ വിദ്ധ്യാര്‍ത്തി പി സി ഉമ്മര്‍ ആണ്. ഉമ്മറിനെ ഇരിങ്ങാലക്കുട പ്രവാസി പേജിന്റെ പ്രത്യേക അഭിനന്ദനം അറിയിക്കുന്നു. 

പ്രവാസ്സ ലോകത്ത് നിന്ന് ഒരു ചിത്രം 

 ഉത്രാളിക്കാവ് പൂരത്തിന്റെ ഒരു ദൃശ്യം. ഫോട്ടോ പോസ്റ്റ്‌ ചെയ്തത് നാസ്സര്‍ അബ്ദുല്‍.

ഇരിങ്ങാലക്കുട ഉത്സവവും അതിനോടനുബന്ധിച്ച ചടങ്ങുകളുടെയും ഫോട്ടോകള്‍ യഥേഷ്ടം Passionate Photographers എന്ന ഫേസ് ബുക്ക്‌ ഗ്രൂപ്പില്‍  ചേര്‍ന്ന് പോസ്റ്റ്‌ ചെയ്യുവാന്‍ നിങ്ങളെ ക്ഷണിക്കുന്നു. കൂടാതെ, നിങ്ങള്‍ എടുത്ത പ്രവാസ്സ ലോകത്ത് നിന്നുള്ള ഫോട്ടോകളും പോസ്റ്റ്‌ ചെയ്യാം. അതില്‍ നിന്ന് തിരഞ്ഞെടുക്കുന്ന ഫോട്ടോ ഞങ്ങള്‍ വാര്‍ത്ത‍ പ്രാധാന്യത്തോടെ ഇവിടെ പ്രസിദ്ധീകരിക്കുന്നതാണ്. ഓരോ ഫോട്ടോക്കും പ്രത്യേകം അടിക്കുറിപ്പും ആവുമെങ്കില്‍ അതിനോട് ചേര്‍ന്ന് ഉള്ള വിവരണങ്ങളും പ്രധാനമായും കൊടുത്തിരിക്കണം. നിങ്ങളുടെ ചിത്രങ്ങളും വാര്‍ത്തകളും akkareninnu@irinjalakudalive.com എന്ന ഇമെയില്‍ വിലാസ്സത്തിലും അയച്ചു തരാം.

Archives
April 25-30  Vol: 04
April 19-25  Vol: 03
April 11-18  Vol: 02
April 04-11  Vol: 01

   location    :  Abu Dhabi
   Image by  :  Ramesh Menon
   Date         : April 19th 2010