ഇരിങ്ങാലക്കുട : അമ്മന്നൂർ ചാച്ചുചാക്യാർ സ്മാരക ഗുരുകുലത്തിന്‍റെ ആഭിമുഖ്യത്തിൽ മുപ്പത്തൊന്നാമത് കൂടിയാട്ടമഹോത്സവം ഗുരു അമ്മന്നൂർ പരമേശ്വര ചാക്യാർ അനുസ്മരണയായി നടത്തുന്നു. മാധവനാട്യ ഭൂമിയിൽ തിങ്കളാഴ്ച വൈകീട്ട് 5 .30 ന്ഗുരുകുല ആചാര്യൻ അമ്മന്നൂർ കുട്ടൻ ചാക്യാർ ഭദ്രദീപം തെളിയിക്കും. കുലപതി വേണുജി അധ്യക്ഷനാകുന്ന അനുസ്മരണ സമ്മേളനത്തിൽ അഡ്വ . തോമസ് ഉണ്ണിയാടൻ ഉദ്ഘാടനം നിർവ്വഹിക്കും. പൊതിയിൽ രഞ്ജിത്ത് ചാക്യാർ പരമേശ്വരചാക്യാർ അനുസ്മരണവും, ഓ. എൻ ഗോപിനാഥൻ നമ്പ്യാർ പൈകുളം ദാമോദര ചാക്യാർ അനുസ്മരണവും, കൂടിയാട്ടം കേന്ദ്ര ഡയറക്ടർ ഡോ. ഏറ്റുമാന്നൂർ പി. കണ്ണൻ പരമേശ്വരാചാക്യാർ സ്മാരകപ്രഭാഷണവും നിർവ്വഹിക്കും. കൂടിയാട്ടത്തിലെ “സങ്കേത നാട്യ ധർമിത” എന്ന വിഷയത്തിൽ ഡോ. ഏറ്റുമാനൂർ. പി. കണ്ണൻ പ്രബന്ധവതരണം നടത്തും. കൗൺസിലർ സന്തോഷ് ബോബൻ ആശംസ പ്രസംഗവും കലാമണ്ഡലം രാജീവ് സ്വാഗതവും കലാമണ്ഡലം നാരായണ നമ്പ്യാർ കൃതജ്ഞതയും രേഖപ്പെടുത്തും. തുടർന്ന് സരിത കൃഷ്ണകുമാർ കംസവധം നങ്ങ്യാര്‍കൂത്ത് അവതരിപ്പിക്കും.

ശ്രീകൃഷ്ണ ചരിതം നങ്ങ്യാര്‍കൂത്തിലെ ഒരു ഭാഗമാണ് കംസവധം. “മല്ലനാമശനി” എന്ന ശ്ലോകത്തിന്‍റെ അഭിനയമാണ് ഇതിലെ പ്രധാന ഭാഗം. മധുരരാജധാനിയിൽ കംസന്റെ സഭയിലേക്കി പ്രവേശിക്കുന്ന ശ്രീകൃഷ്ണനെ കണ്ട്സഭാവാസികൾക്കുണ്ടാകുന്ന വിവിധ വികാരങ്ങളുടെ നവരസാഭിനയമാണ് നടി ഇവിടെ അവതരിപ്പിക്കുന്നത്. ശേഷം കൃഷ്ണൻ കംസനിരിക്കുന്ന മാളിക മുകളിലേക്കി ചാടിച്ചെന്ന്കംസനെ വലിച്ചു താഴെയിട്ട്കഴുത്ത് ഞെരിച്ച് വധിക്കുന്നതോടുകൂടി നങ്ങ്യാര്‍ കൂത്തിന്‍റെ അവതരണം പൂർണമാകുന്നു.