ഇരിങ്ങാലക്കുട : ഏറെ ചരിത്ര പ്രാധാന്യമുള്ള 200 വർഷത്തിലധികം പഴക്കമുള്ള കൂടൽമാണിക്യം അഡ്മിനിസ്ട്രേറ്ററുടെ ഓഫീസ് പ്രവർത്തിക്കുന്ന കെട്ടിടത്തിൽ വിള്ളൽ വീണതിനെതുടർന്ന് അപകടാവസ്ഥയിൽ. ചൊവ്വാഴ്ച കൊട്ടിലാക്കൽ പറമ്പിലെത്തന്നെ വിശ്രമകേന്ദ്ര കെട്ടിടത്തിലേക്ക് അഡ്മിനിസ്ട്രേറ്ററുടെ ഓഫീസ് മാറ്റി പ്രവർത്തിക്കുമെന്ന് അടിയന്തരമായി ചേർന്ന ദേവസ്വം കമ്മിറ്റി യോഗത്തിൽ തീരുമാനമായി. പ്രധാനപ്പെട്ട ഫയലുകളും മറ്റു രേഖകളും ഇന്നുതന്നെ മാറ്റി തുടങ്ങും. സരസ്വതി മണ്ഡപം, തേവാരകെട്ട് എന്നിവ ഈ കെട്ടിടത്തിൽ ഉണ്ടെന്നും, എങ്ങിനെയാണോ കൂത്തമ്പലത്തിന്‍റ പ്രാധാന്യം , അതുപോലെ തന്നെ പ്രാധാന്യമുള്ള കെട്ടിടമാണിതെന്ന് ദേവസ്വം തന്ത്രി പ്രതിനിധി എൻ പി പരമേശ്വരൻ നമ്പൂതിരിപ്പാട് പറഞ്ഞു. അതിനാൽ ഈ കെട്ടിടം സംരക്ഷിക്കപ്പെടേണ്ടതുണ്ടെന്നും അദ്ദേഹം പറഞ്ഞു.

അഡ്മിനിസ്ട്രേറ്ററുടെ ഓഫീസ് പ്രവർത്തിക്കുന്ന മുറിയുടെ തട്ടിനെ താങ്ങി നിർത്തുന്ന മര താങ്ങുകൾ ഒടിഞ്ഞു അപകടകരമായ രീതിയിൽ വിള്ളൽ വീണിട്ടുണ്ട്. മുകളിലത്തെ നിലയിൽ തറയോടുകൾ പൊട്ടി താഴെ ഇരുന്നിട്ടുണ്ട്. ഇതിനു പുറമെ കെട്ടിടത്തിലെ രണ്ട് മൂലകളിലും ചുമരുകളിൽ പത്തിടിയോളം നീളത്തിൽ വലിയ വിള്ളലുകൾ രൂപപ്പെട്ടിട്ടുണ്ട്. കെട്ടിടത്തിന് ചേർന്നു നിൽക്കുന്ന കുളത്തിലെ ഭാഗത്ത് കെട്ടിടം ചെറുതായി താഴ്ന്നിട്ടുണ്ടെന്ന് തിങ്കളാഴ്ച ഉച്ചയ്ക്ക് കെട്ടിടം പരിശോധിച്ച് എൻജിനീയർമാരുടെ സംഘം പറഞ്ഞതായി ദേവസ്വം ചെയർമാൻ പ്രദീപ് മേനോൻ പറഞ്ഞു. അടിയന്തരമായി പുതിയ കെട്ടിടം നിർമ്മിക്കാൻ ദേവസ്വത്തിന് ഭക്തജനങ്ങളുടെ സഹായസഹകരണങ്ങൾ ആവശ്യമാണെന്നും ദേവസ്വം ചെയർമാൻ പറഞ്ഞു. ദേവസ്വം കമ്മിറ്റി അംഗങ്ങളായ ഭരതൻ കണ്ടേൻക്കാട്ടിൽ, അഡ്വ. രാജേഷ് തമ്പാൻ, എ വി ഷൈൻ, ദേവസ്വം തന്ത്രി പ്രതിനിധി എൻ പി പരമേശ്വരൻ നമ്പൂതിരിപ്പാട്, കെ കെ പ്രേമരാജൻ, ദേവസ്വം അഡ്മിനിസ്ട്രേറ്റർ എ എം സുമ എന്നിവർ സന്നിഹിതയായിരുന്നു.